نووسینی: محەممەد ئەحمەدیان
“ڕیشە”
لە باخچەیەک!
گوڵە مێخەکێکی زۆر جوان
لە خوێن سوورتر!
لە قەند و شەکراو شیرنتر!
تەنک و ناسک وەک باڵی مێش!
لە خوناوەی بەهاران و ماسی ساخ تر!
نازی دەکرد، فەخری دەفرۆشت
دەیگوت، جێگەم
ناو گوڵدانێکی لە زێوی
سەر میزێکی ناو کۆشکێکی
پڕ لە کیژە
یان وێش دەچێ
بگوێزمەوە ناو جامخانەی
دووکانێکی
بە خشڵ و زێڕ داڕژاوی
دەوڵەمەندان
هەر شادی بوو، نارەی دەهات
بە خۆی دەکوت
کە من بڕۆم
ئیتر لاولاو تێم ناهاڵێ
فریزوو ئازارم نادا
تاڵایی کەکرە ناچێژم
***
گوڵە مێخەک لە بەختی خۆی
ئارەزووەکەی وەدی هات و
کریستاڵێکی زۆر گران
بوو بە ماڵی!
لە دەوری ئەو چەن کیژێکی
موو لە زێڕی، کراس تەنک
بە دەم هەوایەکی نەرم
لە سەما و هەڵپەڕین دابوون
مێخەک هۆشی لێ بڕا بوو
بە تەواوی سەری جوانی
لێ سووڕ مابوو
کۆنە باخچەی ماڵی ئەسڵی
بۆ کاتێکی زۆر زۆر کەمیش
بیر نەمابوو.
***
گۆڵە مێخەک
لە قووڵایی سەرخۆشیدا
لە خەون و خەوێکی قورس و بێهۆشی دا
دیتی لە ژێر میچی کۆشک
چەندە لاسکە گوڵە باخی
سوور و زەرد و چەن رەنگی تر
سەراوبن و ڕوو لە زەوی
بە مردوویی هەڵواسراوە
زۆر بە ترس و دڵەڕاەکە داهاتەوە
ئەو کات زانی چ ڕووی داوە
خۆی دیت لە ناو قەد بڕاوە
ڕیشە و هەناو و ژیانی
لە باخچەکەی ماڵی پێشووی
بە جێ ماوە!
